يوم عظيم.. يوم إنتصرت إرادة الشعب

إهداء لأمي مصر.. ولكل شهداء 25 يناير

مش هخلي النهاردة يعدي بدون ماكتب حاجة

11/2/2011

تخلى الرئيس محمد حسني مبارك عن الرئاسة

انتصرت إرادة الشعب العظيم الصبور

انتصرت إرادة الولاد السمر.. ولاد النيل

بصراحة أنا خفت في الأول.. حسيت برعب على بكرة..

حسيت إني بعوم بدون اتجاه

بس لما تشوف الفرحة في كل العيون دي..  و الدموع كمان

وتسمع كل الزغاريط دي.. والأغاني دي.. والحب ده

تعرف إن مصر في عيون الشعب.. وقلبه

إن ربنا حاميها بأولادها

كنت مفكرة إن الثورة وإللي جه معاها من انخفاض في الأسهم.. ارتفاع الأسعار..

وقف السياحة.. سفر كل الجاليات من مصر بسبب الخوف

وقف الحال.. الناس بتجوع.. نهب البلطجية والهجامة والحرامية ومعدومي الضمير

الشهداء إللي بيزيدوا يوم ورا يوم.. اللجان الشعبية..

الرعب على أخويا إللي في الشارع.. النوم على صوت الرصاص

كلام كل دولة من ايران، امريكا، اسرائيل، تركيا وغيرهم.. كل دولة بتقسم الكيكة على مزاجها

والأجندات إللي بتتنفذ وإللي ماكناش فاهمين لا أنا ولا أصحابي يعني ايه أجندات

حسيت بالرعب والخوف والحزن..

حسيت ان دي الكبوة..

بس لما تفكر.. وتبص على إللي فات..

تعرف انه لأ.. الكبوة هي سنوات التخلف والفقر والجهل..

الكبوة انعدام أبسط الحقوق الآدامية..

الكبوة كانت سنين العذاب والشرطة الوحشية الهمجية غير الآدامية..

الكبوة كانت نهب اموالنا .. و وأد أصواتنا من قبل ماتطلع

كل من قال "لا" فقد كفر..

دي الكبوة

فتحية لشباب التحرير.. لشباب 25 يناير.. 6 ابريل.. كلنا خالد سعيد..

تحية لكل لأولاد البلد الجدعان الجامدين..

وتحية لمصر حبيبتي.. أمي وأم الدنيا

تحية لمصر حبيبتي.. كلنا ليكي و إليكي.. انت الحب وانت الخير وانت الأرض

مهما كتبت يا أمي فأسلوبي ضعيف بسيط قدام عظمتك وتاريخك

بس كان لازم أكتب.. مقدرش ماكتبش

ماقدرش ماقولش إني بحبك يا مصر

فاعذريني في ضعف أسلوبي

أمي مصر..

نامي الليلادي وعيونك مرتاحة

نامي عشان بكرة هنشيل عنك وجع السنين وظلامها..

ونفكرك بعظمة سنينك وتاريخك إللي فات..

بكرة أجمل.. يا أحلى بلاد الدنيا.. يا بلدي

مها بسيوني في 11/2/2011.. يوم انتصرت إرادة الشعب