في عيد الحب أكتب

طبعا.. وبما إني "سنجل" بلا فخر يذكر..
فأكيد لازم أحتفل مع "ذاتي" العزيزة بعيد الحب.
و مَج الشيكولاته العتيد الفريد الوحيد، ولونه "أحمر" بالمناسبة..
وأعذب ألحان العبقري عمر خيرت..
مقطوعة "حسدوني".. حسدوني على إيه مش عارفة!!!
يمكن حسدوني على الحرية!
حسدوني على ذكائي إللي موقعنيش في غلطهم كلهم وبعمل حساب حد تاني غير نفسي في عيد الحب!!
وإني بدلع نفسي بفسي.. بجبلها إللي بتحبه بالضبط في حدود إمكانيات نفسي..
صاحبتي دايما بتقولي "صدقيني الأيام دي متتعوضش.. هتوحشك في يوم من الأيام" وأنا بقول "آه" .. آه موافقة، ولا آه ألم؟!
أعذروني مش هوضح

بس والله عيد الحب يتحب.. أنا شايفاه مناسبة تقول لأحبابك انك بتحبهم..
خاصة إذا كنت إنسان زي حالاتي نادرا ما بيعبر من مشاعره..
أديها فرصة تستغلها.. تقول لكل إللي يهموك انك بتحبهم.

وبالنسبالي عيد الحب.. كلمة رقيقة تتقال.. وردة وكارت.. ممكن دبدوب أو شيكولاته مافيش مانع..
بس احتفال صاخب وحصره في فئة معينه وهي "العشاق"... كده أزعل..
يعني مش هقول غير لشخص واحد "بحبك" وأهو مش موجود..
يعني ألغي اليوم ده من حياتي لحد ما ربنا يسهلها!!!!!!!!!
لأ طبعا!!.. ده انا هاقول "بحبك" لكل أصحابي..
ولكل أهلي..
ولكل إلي بحبهم..
ولنفسي إللي مونساني كمان.

 

وعوده للواقع..
بما إني قاعده في أودتي..
بسمع موسيقى وبشرب شيكولاته..
فالخيالات رايحة جاية بتترسم قدامي وبتاخدني لكل حبايبي..
منهم البعيد عني.. بعد السنين والأميال بيفصلنا..
ربنا يجمعنا.
منهم إللي عند ربنا..
ربنا يرحمهم ويغفرلهم.
ومنهم إللي معايا في كل يوم.
ربنا يكترهم.. ويحببنا في بعض أكتر.

لكل حبايبي إللي بحبهم..
كل سنة والحب مالي أيامكم.
كل سنة والحب مالي قلوبكم.
كل سنة والحب عنوان لكل أعمالكم.
كل سنة وانتم طيبين..