كُبــاية شــاي وبسكوته

كباية شاي وبسكوتة..
وحبة أفكار طايرة في الهوا..
ساعات بحس اني لما أعمل طقوسي الخاصة..
من حاجة دافية بحضرها وموسيقى هادية بشغلها..
وكمان حاجة حلوة باكُلها..
ساعتها بحس اني ملكت الكون واني أقدر أحقق كل المعجزات..
أفكاري طايرة فوقي وكل ما أحس اني مسكت واحدة..
ألاقيها طارت أكتر وراحت أبعد..
وأقول مش مهم لسة في الكباية حبة شاي..
والبسكوت لسة مخلصش..
لسة فاضل كام دقيقة على موسيقتي ولسة أفكاري حواليا..
كباية شاي وبسكوتة..
ولسة أفكاري بتستعصى عليا..
تلف تلف ولا تحن عليا!!
ويخلص الشاي أو يبرد..
وبسكوتي ملا بفرفيته كل حاجة حواليا.. والموسيقى كمان وقفت..
وأفكاري طارت أعلى وأعلى..
وانا لا ملكت الكون.. ولا حتى أفكاري اللي كانت حواليا!!!