ســاعــات وســاعــات

ساعات بيبقى الواحد فرحان

مبسوط

وبدون سبب

طاير في الهوا طير

روحه خفيفة

كل حاجة طعمها حلو، حتى المر حلو

والألوان كأنها لأول مرة تتشاف

الأغاني حلوة، معانيها حلوة

تتسمع بدل المرة مية

ونسمة الهوا ليها ألف معنى ومعنى

وكأن في رشة أمل، رشة تفاؤل مالية الجو

كل حاجة تقف قدامها

تتأملها وتبتسم

وتتمنى ان الكل يكون وياك

يفرح وياك

يرقص وياك

ويحس باللي جواك

ساعات

وساعات بقى

الدنيا تسود.. تضلم

والقلب يتقل.. وكأنه حمل تقيل جواك

وكل حاجة يبقى ليها نفس الطعم.. طعم ممسخ

والنظارة السودة تتلبس لعاد في الوان ولا حتى ابيض

بس اسود

الحاجات الحلوة وحشة

الحاجات الممتعة مملة

بينقلب معنى الحاجات

ويا محلا الكآبة

يا محلا الحزن والعياط

ويبقى الفرح جريمة

الأغاني عار

والضحك عيب

لأن محدش حاسس بيك

محدش لامس إللي فيك

ساعات

وساعات، بتستغرب نفسك.. ومتفهمهاش.. ومتفهمش انت فين أو عايز ايه أو حاسس بإيه

ساعات بيعدي يومك.. واحساسك جواك غريب.. مابين فرح وحزن.. وعنوانهم صمت

لأن في معظم الساعات.. مهما قلنا.. الكلام مبيوصلش إللي حاسين بيه