مؤخراً.. مبقتش عارفة أكتب
بقالي فترة كبيرة مش عارفة أكتب حتى سطر واحد
حاجة تجيب اليأس
يرحم أيام زمان.. كنت أمسك القلم من هنا ومبطلش كتابة.. حتى لو إيدي هتتشل من الوجع
ودلوقتي.. كل إللّي قادرة أكتبه "مش عارفة اكتب" يعني أضعف الإيمان.. الكتابة عن عدم مقدرتي على الكتابة
يـــااا فرحـــتي
قالولي إقري كتييير ده بيساعد
قرينا ولا ساعد
قالولي إكتبي كل يوم حتى لو سطر
كتبنا ولا أثر
قالولي إكتبي وإنتي في حالة شجن أو حزن أو فرح
إنشجنت وإنحزنت وإنفرحت.. ولا كتبت
طب أعمل إيه أنا؟، إنقذوني
هو أنا أكيييد لا نجيب محفوظ ولا أنيس منصور ولا العقاد
ولا حتى مشروع كاتبة واعدة مستقبل الكتابة والنشر مستنيها عالباب بيخبط
بس أنا بحب اكتب، بحب أوصف مشاعري وأقول إللي جوايا
دي طريقتي في إني أكتب كلام معرفتش أنطقه
يعني لا أتكلم ولا اكتب؟
طب أعمل إيه؟
أسمع موسيقى هادية و أشرب حاجة دافية أصفي ذهني وأستعيذ من الشيطان
وأمسك الورقة والقلم.. وبرضو الكلام مزنوق جوايا
أنا في كلام كتير جوايا. بجد مش هزار
بس عامل زي الخيط المتلعبك، متفهمش جاي منين ورايح فين.. وفايدته إيه!!!
طب هو أنا هفضل كده كتير؟!! الكلام بيزيد جوايا
يوم عن يوم بيكتر، بس مش عارف يطلع
مش عارف يكون حاجة ليها معنى
أهو كلام متبعتر متلخبط.. متلعبك
هتقولولي.. يا فايقة يا رايقة، بقى هو ده إللي تاعبك.. إنك مزنوقة في كلمتين أو تلاتة مش عارفة تقوليهم
إصحيـــي.. فوقـــي.. شوفي الدنيا ماشية إزاي.. والناس عايشة إزاي
هقول.. عندكم حق.. مش معترضة والله
بس ده مكاني إللي بتكلم فيه إللي بفضفض فيه
أكيد كل واحد ليه حاجة بيحب يعملها
أول ميعملها باله بيهدى وبيرتاح
أنا بقى بقالي فترة طويييييلة مش عارفة أرتاح
الموضوع طول لدرجة إني بدات أفقد الأمل
بجد أعمل إيه؟
ليست هناك تعليقات:
إرسال تعليق